Dirección nueva en Naturcorp

Seyes meses depués de la privatización de la gasista vasca Naturcorp, van saliendo los nuevos repartos de cargos en conseyu d'alministración. Hidrocantábrico nombró director xeneral de Naturcorp a Javier Aranburu, antiguu viceconseyeru vascu d'Enerxía y vicepresidente del Ente Vascu de la Enerxía y de la mesma Naturcorp. Per otra parte, l'abogáu que diseñó la privatización de Naturcorp, l'abogáu Mario Fernández, queda con puestu nel Conseyu d'alministración del remocicáu grupu gasista vascu. Como vicepresidente de Naturcorp, y col sofitu de los informes de la consultora UBS Warburg, Aranburu encamentó-y al gobiernu vascu a que vendire Naturcorp -la segunda distribuidora estatal de gas- a la eléctrica asturiana en cuenta de da-yla a Iberdrola, que yera la compañía que más sonaba pa facese cola gasista. El diariu madrileñu El País esplica esta mañana'l repartu de cargos na nueva Naturcorp, y declara que los nombramientos apautárense yá a últimos de xunetu

El repartu de cargos en conseyu d'alministración da-yos puestos d'importancia a les persones que más influyeron al favor d'HC y tamién-y garantiza al Gobiernu vascu, antiguu propietario mayoritariu, el tener xente de confianza en Conseyu. Según l'alcuerdu de la venta, Hidrocantábrico tien cinco persones en conseyu d'alministración, el Gobiernu vasco dos y una l'Ayuntamientu de Donostia, más otru conseyeru de común alcuerdu ente tolos accionistes.

La empresa resultante de la fusión Gas d'Asturies-Naturcorp ye'l segundu operador gasísticu español, con más de 500.000 clientes y con importantes contratos d'aprovisionamientu de gas. Tres de la venta, HC quedó col 62% de les acciones, l'Ente Vascu de la Enerxía'l 32,8% y el 5% l'Ayuntamientu de San Sebastián. D'aquella el Gobiernu asturianu y tola oposición felicitáronse pol trunfu d'HC, qu'afitaba a Hidrocantábrico como ún de los grandes grupos gasistes de la península. Les condiciones de la venta imponíen que se caltuvieren los centros de dirección n'Euskadi, onde'l plan d'inversión venceyáu a la compra tamién presentaba inversiones por 214 millones d'euros.

Entovía queden por sabese'l futuru de la regasificadora y central a gas de la Bahía de Bizkaia, qu'anque de mano nun entraben nel paquete a privatizar sábese que'l Gobiernu vascu quier alxudica-ylos al ganador del concursu.