Dimisión en Central Llechera Asturiana

El vicepresidente de la Central Llechera Asturiana, Jesús Fernández García, presentó ayeri la dimisión del cargu. Anque'l dimisionariu nun quixo dar esplicaciones a la prensa, el desalcuerdu cola política empresarial de la casa y l'ascensu de Pedro Astal apúntense como posibles causes.

La sucesión nel cargu del presidente Saenz de Miera ye ún de los posibles motivos del abandonu de Fernández. L'antiguu valedor de Fernández y fundador de CLAS en 1.969 va dexar el puestu y quien tien toles papeletes pa ocupalu nun ye otru que Pedro Astals. L'empresariu catalán desembarcó en CLAS en 1.993 contratáu pola directiva pa iguar l'abegosa situación económica de la cooperativa (823 millones de perda), aplicando un plan d'empresa durísimu que llevó a la creación de la Corporación Alimentaria Peñasanta al sorber a Ato y fusionase cola Compagnie Letiere Europenne francesa, afitando a CLAS como ún de los mayores grupos llecheros del estáu. Ello foi a cambéu d'adoptar una estructura d'empresa con una directiva profesionalizada y unos oxetivos de mercáu claros, pa lo qu'hubo que vencer la rocea de los socios ganaderos a entrar nuna dinámica en que quedaben relegaos a un segundu planu. La compañía nun llibró nestos años de bien de conflictos llaborales polos intentos de treslladar centros de producción fuera d'Asturies, el más fuerte en marzu de 2.001 y que tuvo parada la producción un mes enteru.

Énte l'ascensu d'Astals, Fernández representa los intereses y la tradición de les grandes families ganaderes del occidente astur, con abondu pesu na historia y evolución de la Central. Natural del conceyu de Valdés y perteneciente al sindicatu agrariu UCA, Fernández tien una ganadería de 130 vaques que produz más de 700.000 llitros al añu.

La Central Llechera tien anguaño 9.000 socios, 7.000 d'ellos inactivos y 2.000 produciendo lleche, pero estos nun aporten más que'l 30% de los más de mil millones de llitros que cuenta con procesar esti añu la corporación, que da trabayu a 1.400 persones. Pa facese una idega del volume de producción que tien la compañía, solo de la planta de Granda (Siero) salen tolos meses 250 contenedores de tren con destinos per tola península.