"Díi por min", soliciten los asturianos nel esterior

Esti sábadu, a les 12 hores, va salir de la Estación del Norte d’Uviéu la manifestación ‘L’asturianu llingua oficial ¡agora!’ entamada pola Xunta pola Defensa de la Llingua Asturiana (XDLA), na que van participar miles d’asturianes y asturianos. Otros munchos residentes nel esterior sofiten la marcha dende la distancia.

Partíos políticos, sindicatos, coleutivos sociales, gaiteros, pandereteres, asociaciones de toda triba, feministes, xente mozo… La convocatoria de manaña de la XDLA pa reclamar la oficialidá de la llingua asturiana y gallego-asturiano, nun momentu nel que l’alderique ta más abiertu que nunca, promete enllenar de música, color y reivindicación les cais d’Uviéu. Son miles les asturianes y asturianos que tienen marcáu nel calendariu esta fecha pa reivindicar la equiparación de los derechos de los falantes d’asturianu y gallego-asturiano colos de castellanu n’Asturies, pero son munchos tamién les que por motivos de trabayu o estudios quixeren tar mañana n’Uviéu y sofiten la convocatoria. “Díi por min”, soliciten dende la distancia.

Ye’l casu de Beatriz Merás, estudiante de Trabayu Social en Madrid, que defende la oficialidá “porque ye una cuestión de derechos y non una imposición al que nun quiera falala”. “Como persona moza quiero que se caltenga’l patrimoniu inmaterial de la mio tierra y, al nun poder acudir a Uviéu, prestaríame que me representaren na mani del sábadu”, solicita la xixonesa.

Al norte, en tierres galeses, reside Xosé Álvarez. “Si hebo una manifestación onde nun pue faltar naide ye ésta. La oficialidá nunca nun cuntó con tanto consensu como agora. Per primer vegada creyo posible ver l'asturianu y a fala oficiales y namái pasará si puxamos tóos xuntos..., magar qu'a dellos nun mos queda otra que facelo de lloñe”, apunta esti asturianu que trabaya en Caerdydd.

Cuando salga la manifestación de la Estación del Norte tará alboreciendo en Colombia, onde vive’l nuesu collaborador, Víctor Fernández Coalla. Esti consultor de proyeutos y profesor universitariu d’Arte y Humanidaes anima dende Cali “a dir a la manifestación pola dignidá de la nuestra cultura. Como decía Perez de Ayala, ‘entre los asturianos en la tierrina y los asturianos en la emigración, tener por cierto que corresponde mayor asturianidad, por decirlo así, a los asturianos en la emigración’”.

Son sólo trés exemplos de les munches y munchos asturianos que van tar ausentes físicamente n’Uviéu mañana pero presentes en corazón nuna xornada histórica pa la reivindicación llingüística n’Asturies. “Agora ye’l momentu”, recuerda la XDLA.