Diez trabayos inauguren la web de 'Asturies, Cultura en Rede'

Yá tán disponibles les pieces de Leticia Baselgas, Ruma Barbero y Rodrigo Cuevas.

La páxina web 'Asturies, Cultura en Rede' inauguróse esta mañana colos 10 primeros vídeos de los 50 que componen el proyeutu. Un total de 140 propuestes presentáronse a esta iniciativa de la Conseyería de Cultura, Política Llingüística y Turismu, baxo la coordinación de la Sociedá Pública de Xestión y Promoción Turística y Cultural, "cola mira de dar mayor visibilidá a los creadores asturianos, dinamizar la cultura nes redes y valorar la estraordinaria aportación del sector a la ciudadanía na llucha contra la crisis provocada pola COVID-19".

Ente les 10 creaciones primeres hai 3 en llingua asturiana. Trátase de 'Pantasma (Cantar, crear, tocar la pandereta)', de Leticia González 'Baselgas', y 'Tecnolóxicos, de sópitu y colo que te pille', de Rodrigo Cuevas, na estaya de 'Música'; y 'Faciendo tebeos', de Ruma Barbero, na estaya de 'Lliteratura'.

Mañana, a les 16 hores, va xubise una propuesta más, pa siguir de llunes a vienres hasta completar el mediu centenar de pieces audiovisuales que conformen 'Asturies, Cultura en Rede'.

Na imaxe, una captura de 'Pantasma' de Leticia Baselgas.