Diez millones d’euros pal Pozu’l Ramu

La Ministra de Cultura Carmen Calvo visitó ayeri Asturies pa firmar l'alcuerdu col Gobiernu asturianu pol que se va construyir en Ribeseya'l Muséu de la cueva del Pozu'l Ramu, rebautizada como "cueva de Tito Bustillo" n'alcordanza del espeleólogu fallecíu n'accidente y que descubrió'l yacimientu en marzu de 1968, revelando a la humanidá la esistencia d'un importante yacimientu del paleolíticu magdaleniense.

Madrid va poner el 70% de la financiación pa esti muséu que se cuenta con tener abiertu pal 2008, mientres que'l gobiernu asturianu va poner el 30% que falta hasta iguar los 10,6 millones d'euros del presupuestu total de la operación. La Ministra de Cultura declaró que'l so departamentu va trabayar pa que la UNESCO declare Patrimoniu de la Humanidá la Cueva del Pozu'l Ramu, anque reconoció qu'ello va ser dificil en cuantes qu'España yá ye ún de los estaos que tien más llugares rellacionaos cola prehistoria reconocíos pola UNESCO.

El proyectu pal muséu prevé un edificiu de 3.000 metros cuadraos repartíos en trés plantes, de les que la primera va atechar el muséu, con sales pa esposiciones temporales y permanentes y recreaciones, amás d'instalaciones espectaculares como una bóveda sobre la que se van proyectase imáxenes en trés dimensiones del interior de la cueva, de la que va facese un paséu virtual. La planta baxa del edificiu va atechar la cafetería, tienda, salones d'actos y otres dependencies y el sótanu va acutase p'almacenes y llaboratorios d'investigación.