Diez conceyos yá tienen mapes cola so toponimia tradicional

Siero, Bimenes, Amieva, Quirós, Ḷḷena, Samartín d’Ozcos, Santalla d’Ozcos, Vilanova d’Ozcos, San Tiso d’Abres y Muros son los diez conceyos que yá cuenten con mapes cola so toponimia tradicional, la única oficial. El Serviciu de Cartografía del Gobiernu encárgase d’esti llabor tres un trabayu de xeorreferenciación.

La Direición Xeneral d’Ordenación del Territoriu y Urbanismu, área de la que depende Cartografía, va estender esti trabayu a tol territoriu de la comunidá. En 49 conceyos yá finaron el trabayu, de los que 10 yá tienen el mapa, en 12 tán finando y n'otros 5 van entamar col añu nuevu.

Quedaríen pendientes los 12 conceyos qu’entovía nun tienen oficializada la toponimia tradicional, esto ye, Cabrales, Llanera, Castropol, Somiedu, Cuideiru, Ayande, Caravia, Ibias, El Valle Baḥu de Peñamellera, Salas, Navia y Pravia. D’ellos, Cabrales ye’l más cercanu en finar el trámite.

Esti proyeutu de realización de mapes cola toponimia oficial ye posible gracies a la documentación previa apurrida pola Conseyería de Cultura, Política Llingüística y Turismu y la Xunta Asesora de Toponimia, teniendo en cuenta los criterios de l’Academia de la Llingua Asturiana, y a la collaboración de los propios conceyos. Los profesionales en materia de cartografía del Gobiernu fixeron, en collaboración con cada ayuntamientu, un trabayu de xeorreferenciación de los topónimos oficiales incluyíos nos decretos d’oficialización pa treslladalos a la cartografía nueva de caún de los conceyos.

Descarga llibre

Los mapes recueyen con un nivel de detalle bien grande los distintos asentamientos de población: parroquies, villes, aldees, barrios, quintanes tradicionales y cases disperses. Dientro de poco van tar disponibles nel Sistema d’Información Territorial y Infraestructura de Datos Especiales d’Asturies (SITPA-IDEAS), dende onde van poder descargase.

Na semeya, el mapa de Siero.