Diez bandes de dellos estilos presenten la so candidatura al Premiu al Meyor Cantar

Dende’l pop infantil hasta la tonada, pasando pol rock o’l folk electrónicu. Diez bandes de dellos estilos aspiren a pasar el corte de cinco que-yos permita participar na gala del Premiu al Meyor Cantar y buscar billete pal Liet International de Còrsica.

Pese a que nel llistáu de candidatos a llevar el gallardón al meyor cantar del añu 2012 hai bandes que yá conocen lo que ye participar na gala que tien llugar siempre nuna fecha cercana al Día Internacional de la Llingua Materna (21 de febreru), como Xera, ganadores del añu 2010 y segundos nel Liet International d’An Oriant, y finalistes l’añu pasáu, o Fala non Caduca, participantes na edición del 2010, la mayor parte son debutantes. Asina, según informó ayer TPA Noticias, aspiren a tocar per primer vegada nesti eventu retresmetíu en direuto pola canal pública les bandes de rock Sambre y ACD, el folk-metal de Taranus, la canción tradicional de Fernando Valle Roso o del proyeutu Aire, la pachanga-folk en gallego-asturiano d’Os Folkgazáis, la canción reivindicativa d’Imanol Núñez y el pop pa neños y neñes de Petit Pop, grupu integráu por Mar Álvarez, Lara González y Covadonga de Silva, trés músiques conocíes pol so pasáu en formaciones del Xixón Sound.

El ganador de la gala al Premiu al Meyor Cantar tendrá la recompensa de representar a Asturies Liet International, que nesti 2013 va tener llugar en Còrsica. L’añu pasáu foi l’Asturiana Mining Company la banda que tuvo’l tal privilexu en casa, nel Teatru de la Llaboral de Xixón, gracies al so trunfu, tamién na instalación xixonesa, con ‘Si nun conoces Vaḷḷouta’. Esti tema llevaríase’l premiu del públicu nel festival européu de la canción en llingües minorizaes y quedó cuarta na puntuación del xuráu.

Na semeya, un momentu de l'actuación d'Asturiana Mining Company na gala del Premiu al Meyor Cantar del añu pasáu.