Díes contaos pa la tóxica yerba de Santiago en Brañagallones

|
Yerba de Santiago

El Gobiernu, el Conceyu de Casu y la FEMPA llamen a la ciudadanía a participar nuna xornada pa desaniciar la planta del llugar.

Anque la Jacobea erucifolia, tamién llamada yerba de Santiago pese a qu'ésta responde realmente al nome científicu de Jacobea vulgaris, nun ta catalogada como invasora, sí resulta tóxica pa la mayoría de los mamíferos, incluyíu l'home, yá que contién alcaloides y lactones qu'afecten principalmente al fégadu. Por ello, entámase'l 6 de setiembre una xornada de voluntariáu p'acabar, al traviés de medios mecánicos, cono esta especia na vega de Brañagallones.

Los interesaos en collaborar pueden inscribise, primero del llunes 3 de setiembre, al traviés del corréu electrónicu de la Federación de Deportes de Monte, Escalada y Sienderismu del Principáu d'Asturies (FEMPA) secretaria@fempa.net o nel teléfonu del Conceyu de Casu (985.60.80.02). El xueves habrán de personase a les 9 de la mañana nel aparcamientu de Bezanes pa xubir en vehículu tooterrén o taxi a la vega de Brañagallones, onde van entamase los grupos.

La Direición Xeneral de Biodiversidá va entregar a los voluntarios les ferramientes, guantes y contenedores que se van usar pa tresportar y, darréu, destruyir les plantes. Cuando fine la xornada, téunicos de la Conseyería d'Infraestructures, Ordenación del Territoriu y Medio Ambiente van revisar la zona y van recoyer los exemplares dispersos.

L'actividá va concluyir sobre les 14 hores con una espicha pa los participantes nel refuxu-parador.

Na imaxe, Jacobea vulgaris. Semeya obra de Christian Fischer baxo llicencia CC BY-SA 3.0.

Contador Estadistiques