Diecisiete conceyos y otres 23 entidaes llocales nun presentaron les sos cuentes a tiempu

La Sindicatura de Cuentes del Principáu d’Asturies anunció que nel 2015 empeoró’l grau de rendición de cuentes de les entidaes llocales asturianes. Diecisiete conceyos, catorce mancomunidaes, ocho consorcios y una parroquia nun les entregaron en plazu.

“Interrumpióse la sienda de meyora de los años úlitmos, polo que ye preciso insistir n’actuaciones feches y otres midíes, pa cumplir de manera estricta tolos trámites de rendición de cuentes y aprobación del presupuestu”, apunta la Sindicatura nun informe. El número total d’entidaes llocales que lo fixeron en plazu fue de 107, esto ye, un 72,8 por cientu del total, frente al 81 por cientu del exerciciu anterior.

Les parroquies foron les más eficientes (97,4 por cientu; 100 por cien nel 2014), siendo Zarréu la única que nun presentó les cuentes a tiempu. Mentes, nel casu de los conceyos, son 14 de los 78 los que nun cumplieron cola so obligación: Ayande, Bimenes, Cangues d’Onís, Carreño, Grandas, Llaviana, Ḷḷena, Llanes, Mieres, Piloña, Ponga, Ribedeva, Salas, Teberga, Vilanova d'Ozcos, Villaviciosa y Villayón.

Los cumplidores, mentes, foron un 78,2 por cientu del total, por un 89,7 por cientu del 2014. Hai que destacar que, a esceición de Nava, que lo fixo n’agostu, los 61 restantes entregaron les cuentes la selmana cabera de plazu.

Les mancomunidaes y consorcios, el nivel más baxu

Tanto les mancomunidaes como los consorcios presenten un nivel mui baxu de cumplimientu, un 17,6 por cientu (35,3) y un 38,5 por cientu (30,8), de manera respeutiva. “En dambos tipos d’entidaes hai delles ensin actividá, polo que debería revisase la so propia razón de ser. Nes mancomunidaes sería recomendable acelerar el desaniciu d’aquelles qu’aniciares dichu procesu”, recomienda la Sindicatura.

Cabu Peñes; Cangues d’Onís, Amieva, Ponga y Onís; Rexón d’Avilés; Rexón Vaqueira; Rexón del Sueve; Parres y Piloña; Del Nora: Grau y Yernes y Tameza; Llanes-Ribedeva; Occidental; Ozcos-Eo; Suroccidental d’Asturias; Valle del Nalón y Valles del Osu son les catorce mancomunidaes incumplidores, mentes que Baxo Nalón; Costa Norte; Camín Real de la Mesa; Pa Desarrollu de la Montaña Central d’Asturies; la Feria de Muestres de Grau del Comerciu y la Industria Tradicional, COXERSA; la Feria de Muestres y Esposiciones de Samartín del Rei Aurelio; y Turísticu de Cangas del Narea, los ochos consorcios. D’elles, la Rexón Vaqueira; Del Nora; Occidental; Suroccidental d’Asturias; Baxo Nalón; Costa Norte; y Turísticu de Cangas del Narcea, nun tienen actividá.

“El resultáu nun ye satisfactorio, polo que se fai necesario siguir insistiendo nel trabayu que vino faciendo la Sindicatura de Cuentes, siendo más importante que nunca’l concursu del personal téunicu y de los responsables políticos de les propies entidaes llocales, asina como l’apoyu de la Federación Asturiana de Conceyos, la Federación Asturiana de Parroquies Rurales y el Colexu de Secretarios, Interventores y Ayalgueros d’Alministración Llocal d’Asturies”, señalen nel informe.