La Pola Siero vive esta fin de selmana la so cita añal colos cantarinos y la sidra. El VI Certame de Cantares de Chigre axunta a dieciocho tertulies d’Asturies y Cantabria en dieciséis establecimientos de la ciudá.

L’Asociación Amigos del Roble entama esta actividá que coincide, al igual que tolos años, cola celebración del Antroxu. Asina, les persones que s’averen a los dieciséis chigres participantes de La Pola ente les 21 y 23 hores de güei y mañana, van poder disfrutar de les voces d’una tertulia asignada por sortéu. A lo llargo d’estes dos hores, los integrantes d’estos grupos formaos por ocho o diez persones, que son convidaos a merendar polos chigreros, van cantar temes tradicionales asturianos.

Nesta ocasión van participar tertulies procedentes de los conceyos de Siero, Avilés, Colunga, Noreña, Nava y Uviéu, amás de dos formaciones cántabres. Un representate de caúna d’elles va recibir un troféu y un diploma a les 20 hores de güei nel Auditoriu como recuerdu de la so participación nesti certame.