Dexónos Eladio Sánchez, direutor de la Compañía Asturiana de Comedias

|
Pili Ibaseta, Arsenio González, Mar Buelga, Manuel Aller y Eladio Sánchez

L'actor y tamién autor d'obres teatrales finó na nueche del xueves a los 86 años.

Casi nueve meses depués de la muerte d'Arsenio González, la Compañía Asturiana de Comedias y el teatru asturianu tornen a sufrir otra gran perda. Eladio Sánchez, direutor de la centeneria agrupación teatral y fíu de la so fundadora, Aurora Sánchez, morría tres un tiempu con problemes de salú, afeutáu por un cáncer.

Natural del barriu xixonés de Ciares, de la so mano, xunto con otros compañeros sobre les tables, recuperó nel 1986 la histórica Compañía Asturiana de Comedias. Lalo, como yera conocíu, garró la direición del grupu cola intención de recuperar la época dorada de los 40 y 50, cuando la compañía llevó pel tol mundu les obres de creadores asturianos como Pachín de Melás, Manuel Llaneza o Agustín de la Villa, ente otros munchos.

Nestos 22 años caltúvose al frente de l'agrupación, puxando por un xéneru, el del teatru tradicional asturianu, que ganó vitalidá y públicu nesti tiempu. Dende Asturies.com queremos unviar un abrazu fuerte a familia, amigos y compañeros del mundu del teatru de Sánchez por esta perda.

Na imaxe, Sánchez a la derecha mientres una representación xunto con Pili Ibaseta, Arsenio González, Mar Buelga y Manuel Aller. Semeya de la Compañía Asturiana de Comedias.

Contador Estadistiques