Destinaránse 109.250 euros pa prevenir daños del osu y el llobu

María Jesús Álvarez, conseyera de Desarrollu Rural y Recursos Autóctonos, anunció na Xunta Xeneral que nos díes próximos va convocar una llinia d’ayudes pa prevenir daños del osu y el llobu. La cantidá total de la subvención va ser de 109.250 euros.

D’esta cifra, 49.375 euros van dedicase a empreses y 59.875 a particulares, siendo un 75 por ciento pa los daños causaos polos llobos y el 25 por ciento restante, pa los de los osos. Nel primer casu, va ser principalmente p'aquelles empreses o particulares allugaos n'espacios protexíos que sufrieren problemes nos trés años últimos. Les ayudes van destinase a estes actuaciones: zarraos permanentes de malla fixa y zarrada que torgue'l pasu del llobu, alquisición de perros mastines y construcción de corralaes temporales que torguen el pasu del animal.

Mentes, les dedicaes pa prevenir los daños producíos polos plantígrados van otorgase preferentemente a empreses o particulares allugaos nel área de distribución actual del osu pardu y n'espacios protexíos que rexistraren incidentes nos trés años últimos. Estes subvenciones van ser pa la proteición de truébanos con estructures fixes y pa zarros lletrificaos.