Despidos, deslocalización y especulación n’El Comercio

El despidu de 29 trabayadores ensin posibilidaes de recolocación, el treslláu de la rotativa dende Xixón a Benavente y especulación urbanística; son les tres pates de la operación qu’arrodia al diariu El Comercio.

Nel últimu comunicáu tresmitíu pol colectivu de trabayadores d’El Comercio, afirmen que’l director xeneral del periódicu, Julio Maese Guisasola, y el director financieru, Goyo Ezama Meabe, “persisten nos sos planes d’esterminiu” del periódicu.

D’esti mou, cerrarán la rotativa d’El Comercio en Xixón y van llevala a la llocalidá zamorana de Benavente, dende onde’l diariu va tener que tresportase pa distribuyilu per toa Asturies. A la deslocalización, súmase’l despidu de 29 trabayadores ensin posibilidaes de recolocación, dalgunos con más de trenta años d’antigüedá.

“Los terrenos qu’ocupa’l periódicu con mayor tirada en Xixón y segundu n’Asturies son tarrén pa la especulación inmobiliaria”, señalen los trabayadores mientres indiquen que “al paecer, yá se vendieron a una constructora pa enllenar la zona de viviendes”.

“Fai unos años, corrió’l rumor de qu’una de les grandes constructores asturianes ofreciera cerca de dos millones d’euros polos terrenos, asitiaos ente les casi L.luarca, Teodoro Cuesta y Diariu El Comercio”, sigue’l comunicáu qu’afirma que’l rotativu pasaría a ubicase notra zona de la ciudá.

Beneficios pa Madrid y Bilbao
600.00 euros ye’l beneficiu que tuvo El Comercio mientres l’añu 2009; sicasí, según el colectivu d’empleaos, los beneficios de toa esta operación nun quedaríen n’Asturies, sinón que “diríen de secute pa Madrid y Bilbao, los centros de poder del Grupu Vocentu, brazu mediáticu del BBVA”.

A la escontra d’esta situación, los trabayadores afirmen que van siguir coles movilizaciones y intensificales: “son cerca de 5.000 les firmes contra’l pieslle de la rotativa que reunimos en malpenes dos selmanes y siguimos sumando apoyu de persones y colectivos”, acaba’l comunicáu de los trabayadores d’El Comercio.