Descubren un túmulu del Neolíticu na campa L’Españal

El proyeutu d’investigación arqueolóxica entamáu pol Conceyu de Samartín del Rei Aurelio na campa L’España en collaboración cola Conseyería d’Educación y Cultura descubrió un túmulu del Neolíticu. Xunto a él apaecieron dellos oxetos venceyaos a rituales funerarios.

Los trabayos na zona nel altu de L’Españal surden a partir de les obras de reforestación de La Casilla, cuando por azar apaecieron indicios qu’apuntaben a un posible xacimientu na zona. Nesi momento’l Conceyu paralizó les obras y instaló un perímetru de proteición, para darréu encomendar a un equipu d’investigadores, dirixíos pola arqueóloga Covadonga Ibáñez, la escavación arqueolóxica que se fixo mientres los meses de xunu y xunetu.

Fruto d’esos trabayos constatóse la presencia d’un túmulu qu’aporta importantes datos científicos al conocimientu qu’hasta agora teníase sobre’l mundo funerario mientres’l Neolítico na cuenca del Nalón, yá que se trata de la primer investigación arqueolóxica con metodoloxía sistemática fecha na zona. Ésti ye del III Mileniu, de dimensiones reducíes: alredor de 6 milímetros de diámetru.

Namái s’escavó un total de 28,5 metros cuadraos, dalgo de la metá del espaciu tumular identificáu, lo que quier dicir qu’esta pequeña ayalga podría albergar descubrimientos nuevos nel futuru.

Proyeutu museísticu

Consciente del valor patrimonial del descubrimientu, la conceya Cultura, María Alonso avanzó que va encargar pa esti añu “la redaición d’un proyeutu museísticu pal túmulu del monte L’Españal qu’estudie toles víes de financiación posibles, al traviés de la collaboración d’entidaes públicas o privaes, p’afrontar nel 2017 tanto la restauración del túmulu como la puesta en marcha del proyeutu de musealización. Nun vamos a escatimar esfuerciu nengún pa qu’esta iniciativa tenga’l mayor desarrollu y proyeición posibles”.