Desarrollu Rural invierte na meyora de caminos en Cangues d'Onís y Piloña

Caúna de les intervenciones tien un costu superior a los 45.000 euros.

La Conseyería de Desarrollu Rural y Recursos Naturales axudicó’l proyeutu de meyora del camín de Cuerres a Gustevela, nel conceyu de Cangues d’Onís, por un importe de 48.937 euros y un plazu d’execución de dos meses. Les obres de la vía, únicu accesu transitable a Gustevela, van realizase sobre un llargor de 1.960 metros y van consistir en formigoniar les zones en peor estáu, la execución d’una cuneta revistida y la iguadura de badenes en formigón p’ameyorar el drenaxe. 

Tamién ta previsto executar un movimientu de tierra p’ameyorar les maniobres en dalguna de les curves y l’acondicionamientu con un pase de motoniveladora. El proyeutu de meyora va completase con una capa de rodadura de tritu nos tramos del camín más llanos que s’atopen erosionaos y que nun se formigonien.

Mientres, en Piloña ta prevista l'actualización del accesu ente Ogavia y Sarayón, en Piloña, por un importe de 47.769 euros, y un plazu d'execución tamién de dos meses. El proyeutu tien como oxetivu la execución d'un accesu aptu pa vehículos agrícoles, que dexe'l correctu desenvolvimientu ganaderu de la zona. Amás, el camín va convertise nuna infraestructura contra quemes al dexar que los medios d'estinción terrestres accedan a la mayada.

Les obres nesta infraestructura de sofitu al sector agrícola y forestal, financiaes con fondos Feader, van consistir nel enanche y meyora de la caxa del camín actual nun llargor de 1,18 quilómetros.