Desarrollu Rural asesora a 3.300 esplotaciones agraries

La Conseyería de Desarrollu Rural y Recursos Naturales destina 300.000 euros n’ayudes p’asesorar a 3.300 esplotaciones agraries. Failo al traviés de cooperatives, sociedaes de tresformación y organizaciones profesionales y de productores qu’empresten esti tipu de servicios.

El Gobiernu atiende asina toles solicitúes presentaes, qu’algamen la docena. Con estes ayudes sofítase la implantación de servicios d’asesoramientu dirixíos a les empreses actives nel sector agrícola, subvencionando los gastos de personal que se xeneren.

Los productores van recibir asesoramientu sobre les obligaciones que suponen los requisitos de xestión o la normativa sobre les bones condiciones agraries y medioambientales de la tierra qu’estipula la Xunión Europea, amás de sobre la meyora de los resultaos económicos de les esplotaciones y les normes de seguranza llaboral. Tamién se va aconseyar a los llabradores qu’empecipien l’actividá sobre la producción ecolóxica, los aspectos sanitarios de la cría d’animales y les cadenes de distribución curties.

Amás, van recibir información sobre la promoción y desenvolvimientu de la incorporación de les muyeres a l’actividá agrícola y ganadera.