Desaniciaránse les especies invasores de la ría de Villaviciosa

L'ámbitu d'actuación va ser la Reserva Natural Parcial y la eliminación será por estraición selectiva de manera principal.

La Conseyería de Desarrollu Rural y Recursos Naturales va realizar, en collaboración cola Obra Social La Caixa, trabayos d'eliminación y control d'especies invasores na Reserva Natural Parcial de la Ría de Villaviciosa, con un costu de 59.771 euros y un plazu d'execución de trés meses. Los trabayos van facelos la empresa Tragsa, que va contratar pa ello a cuatro persones en riesgu d'esclusión social.

La proliferación d'estes especies, daqué qu'asocede tamién n'otres zones d'Asturies y Europa, resulta especialmente esmolecedora nesti casu, yá qu’afeuta a hábitats dunares y d'estuariu dientro d'un espaciu protexíu. Los trabayos van consistir na eliminación de plantes como la yerba de La Pampa, uña de gatu, onagra, senecio mikaniodes, margarita africana, conyza bonariensis, conyza canadensis y cotula coronopifolia, ente otres.

Al cohabitar estes especies coles autóctones, la so eliminación va llevase a cabu, principalmente, per medio d'una estraición selectiva, so la supervisión de personal esperto na identificación mesmo de les invasores como de la vexetación propia del país. L’área d'actuación va ser una superficie de 23 hectárees pertenecientes a la Reserva Natural Parcial de la Ría de Villaviciosa.