Desakato lleva al direuto'l discu nuevu con un conciertu en llinia

La banda de Llanera adáutase a la situación actual emplegando les nueves teunoloxíes.

La pandemia de COVID-19 garró a Desakato a piques d'asoleyar ‘La miel de las flores muertas’, el trabayu nuevu de la banda', y con numberoses feches pa llevalu al direuto n'axenda que nun se pudieron celebrar. El 27 de marzu l'álbum sonó en miles de reproductores de mediu planeta y dende entós los miembros del grupu empezaron a cavilar n'opciones pa facer lo que más-yos presta: tocar.

"Tamos intentando adaptanos a esti tiempu que nos toca vivir y vamos preparar un conciertu en llinia pa la xente que quiera velo al traviés de cualquier dispositivu", avanzó nuna entravista a Asturies.com Pablo Martínez Pérez, voz y guitarra, que considera qu'esti modelu "pue ser una alternativa bona" pa la sobreviviencia de les bandes "nesta situación tan complicada que tamos viviendo". El día de l'actuación va ser finalmente güei, con más de 1.000 accesos vendíos.

El preciu pa siguir el conciertu dende casa o dende cualquier llugar del mundu ye de 6 euros. L'eventu va comenzar a les 22.30 hores y va contar con una producción profesional y una puesta n'escena orixinal.