Desactívase la prealerta por contaminación en Xixón y redolada

El Gobiernu decidió desactivar na mañana d’esti miércoles la prealerta por contaminación en Xixón y la so redolada, anque caltién el nivel d’avisu por esta problemática, al igual que n’Avilés. Mediu Ambiente toma esta decisión tres ver comprobar una meyoría nos datos rexistraos nes estaciones nes 24 hores últimes.

Éstos apunten que nun se superó la llende de concentración de partícules inferiores a diez micras (PM10), fixáu en 50 microgramos por metru cúbicu. Nel casu d’Avilés, tamién baxaron los valores y la única estación que superó ayeri el tope diariu foi la de Mataderu, que nun se considera pa l’activación del protocolu d’actuación en situaciones meteorolóxiques que dificulten la dispersión de partícules. Amás, según informen dende Mediu Ambiente, mientres esta mañana tán rexistrándose valores perbaxo los 50 microgramos por metru cúbicu en toles estaciones.     

El llunes declaróse’l nivel de prealerta por contaminación atmosférica na zona de Xixón, que se caltuvo ayeri, mientres que n’Avilés tomóse la mesma midida, anque col nivel d’avisu. Esta decisión implicó l’adopción de midíes preventives y correctores, como la intensificación de riegos, la prohibición de tráficu pesáu nes zones de mayor densidá de población dende les 7 y les 9 hores, y una vixilancia especial sobre les actividaes industriales que provoquen llevantamientu de polvu.

Mediu Ambiente esplica que “la estabilidá atmosférica y les inversiones térmiques, situaciones nes que les partícules queden atrapaes cerca del suelu con un riesgu mayor pa la salú, provocaron al comienzu de la selmana un empeoramientu de la calidá del aire y dificultaron la dispersión de contaminantes, agravada tamién polos efectos de les quemes forestales”. El Conseyu de Gobierno tien previsto aprobar próximamente un protocolu d’actuación que va poder ser activáu nes distintes zonas del área central del país en circunstancies esceicionales.