Denis Soria gana’l XX Concursu de Cuentos Curtios El Garrapiellu

El xuráu del XX Concursu de Cuentos Curtios El Garrapiellu decidió dar el primer premiu a Denis Soria Fernández pol so rellatu ‘La Vengación’. L’accésit foi pa Pablo Rodríguez Alonso pol cuentu ‘Vae victis’.
 
D’esta forma, Soria llévase una recompensa de 900 euros, mentes que Rodríguez Alonso recibe 300 euros. El xuráu d’esta edición del concursu decanu de los premios en llingua asturiana tuvo compuestu pol académicu de la llingua Vicente García Oliva; l’escritor y ganador de la edición pasada, Sergio Manuel Buelga Casas; l’escritor y editor, Milio Rodríguez Cueto; y l’escritor José Luis Rendueles.
 
Les cuatro persones encargaes de fallar el premiu destacaron el bon altor lliterariu algamáu na mayoría de los cuentos. Asina mesmo, destacaron la mocedá del ganador del cuentu: “Que la xente mozo escriba n’asturianu afita nel tiempu y na hestoria la supervivencia de la llingua llariega del país”, señalaron. Mentes, dende la Tertulia Cultural El Garrapiellu quixeron agradecer a tolos participantes y a los miembros del xuráu’l so esfuerciu.