Dellos actos espardíos per tola xeografía asturiana celebraron ayeri los 75 años de la proclamación de la Segunda República Española

El setenta y cinco aniversariu de la proclamación de la Segunda República Española, qu'entamó oficialmente'l 14 d'abril del 1931, celebróse n´Asturies con dellos actos, los más d'ellos marcaos pola alcordanza del tráxicu final d'esti réxime políticu cola Guerra Civil Española del 36. Los actos más concurríos foron en Xixón onde pela mañana l'Atenéu Obreru y la Sociedá Cultural Xixonesa convocaben a asistir al Cementeriu d´El Sucu en Ciares, onde se fexo homenaxe a la fosa común de muertos na Guerra Civil, énte la que Victor Guillot lleó un testu sobre'l fechu históricu qu'aconceyaba a la xente ellí presente y el duu Minuet tocó delles pieces musicales, ente elles l´Himnu de Riego. Dempués hebo una ufierta floral na fosa común a la qu´asistieron unes sesenta persones.
Pela tarde, cola organización de l´Asociación pola Memoria Hestórica d´Asturies, la Coordinadora d´Asociaciones de la Memoria Hestórica d´Asturies y el grupu municipal de Izquierda Xunida nel ayuntamientu celebraron otru actu nel mesmu sitiu cola asistencia de cerca d'un cientu persones y nel qu´intervienieron el presidente de l´Asociación, Victor Luis Álvarez, y el concejal d´Izquierda Xunida, Jesús Montes Estrada "Churruca". Tamién taben presentes la conceyala socialista Begoña Huergo y Jesús Iglesias d´Izquierda Xunida. Nesti actu presentóse la maqueta del monumentu nel que se van recoyer los nomes de tolos fusilaos en Xixón y que se pretende facer nesa parte del cementeriu –onde ta El Paredón nel que se fusilaba a los deteníos republicanos- y averao a onde tán enterraes unes mil seiscientes persones.
Tamién fizo anuncia Jesús Montes Estrada nesti actu de que l'Ayuntamientu de Xixón va crear un Centru pola Recuperación de la Memoría Hestórica nesti añu pa "caltener l´alcordanza de los fusilaos y de la represión", siñalando qu´en Xixón "fusilóse xente dende 1937 hasta 1949".
Pela so parte l´Agrupación Socialista de Xixón organizó una cena na Casa'l Pueblu pa festexar la proclamación republicana`l 14 d´abril de 1931.


En Grau tamién se celebró un actu nel que s´izó la bandera republicana, cola asistencia del Alcalde, José Sierra, dellos conceyales y los cabezaleros d´Izquierda Xunida Gaspar Llamazares y Jesús Iglesias. José Sierra fizo alcodanza de que, nesa data del 14 d´abril, el poeta Antonio Machado llevantó la bandera republicana na casa conceyu de Segovia, lleendo darréu un testu del escritor del añu 1936 sobre la República.
N´Uvíéu hebo un actu nel cementeriu d´El Salvador convocáu pola Asociación de Familiares y Amigos de la Fosa Común nel que se fizo la tradicional ufierta floral a los republicanos executaos nel conceyu y nel que'l SOMA-FIA-UXT celebró'l Día la República.
N'Avilés l'Asociación Cultural "Delta Sieglu XXI" fizo un homenaxe a la Segunda República y tolos que participaron nella con una ufierta floral nel monolitu del cementeriu de La Carriona.
Tamién hebo un actu en Pravia, cellebráu na cantera de Cañéu con una ufierta floral, que dende hai dellos años vienen faciendo familiares de los ellí fusilaos ya Izquierda Xunida del conceyu Pravia.