Del Busto reclama a Montserrat la recuperación de la sanidá universal

|
Del Busto reclama a Montserrat la recuperación de la sanidá universal

El conseyeru de Sanidá, Francisco del Busto, aconceyó esti xueves cola ministra Dolors Montserrat, reunión na que tamién tuvo presente Pilar Varela, responsable de Servicios y Derechos Sociales. Nella reclamó al Executivu estatal la recuperación de la sanidá universal y un fondu económicu que garantice la igualdá territorial.

Dar esti pasu permitiría ufiertar asistencia sanitaria a los inmigrantes en situación irregular, a los que'l ministeriu retiró esta prestación. Asina mesmo, Del Busto demandó a Montserrat qu'habilite de forma inmediata un fondu económicu que garantice un accesu equitativu a los fármacos nuevos y les teunoloxíes innovadores, asina como una estratexa de control de precios pa evitar situaciones d’oligopoliu nel sector.

Del Busto tamién treslladó a la ministra la esmolición d’Asturies por garantizar el financiamientu de les prestaciones sanitaries con criterios d’igualdá en toles comunidaes. “Queremos que, al igual que nós facemos n'Asturies, tola ciudadanía tengan accesu a los meyores medios téunicos y profesionales con independencia del so sitiu de residencia, del so nivel educativu o de les sos rentes”, señaló.

Amás, pidió que s'asegure la derivación a los centros de referencia estatal de los pacientes que lo precisen, compensando los gastos al traviés de los fondos de cohesión. “Un fondu que tristemente cuasi desapaeció por una decisión unillateral y inxusta del Gobiernu central, qu'abandonó'l so papel de regulador”, denunció.

Nesti sen, indicó que la meyora de les derivaciones dexaría que los centros, servicios y unidaes de referencia del Sistema Nacional de Salud, ente los que s'atopa l'Institutu Nacional de Silicosis, pudieren tratar a más persones procedentes d'otres comunidaes ensin qu'esto suponga una carga económica adicional.

Na semeya, Mario Garcés, secretariu d'Estáu de Servicios Sociales y Igualdá; Montserrat, José Javier Castrodeza, secretariu xeneral de Sanidá; Del Busto; y Varela.

Contador Estadistiques