Del Busto esixe a Rajoy que cumpla col so compromisu sobre los fármacos pa la hepatitis C

El conseyeru denuncia qu'incumple l'alcuerdu del Conseyu Interterritorial al negase a facilitar los creitos pa los tratamientos.

Francisco del Busto unvió ayeri una carta al ministru de Sanidá, Servicios Sociales y Igualdá, Alfonso Alonso, nel qu'esixe al Gobiernu estatal en funciones que cumpla col so compromisu de financiar la compra de los tratamientos d’última xeneración pa la hepatitis C poles comunidaes autónomes y “dexe de poner torgues” pa que los pacientes que lo precisen sigan recibiendo los fármacos nuevos. Demanda que s'incluya esti asuntu nel orde del día del próximu Conseyu Interterritorial del Sistema Nacional de Salú.

El conseyeru de Sanidá recordó, amás, que la decisión del Gobiernu central de computar los tratamientos pa la hepatitis C como déficit contravién l’alcuerdu alcanzáu ente’l ministeriu y les comunidaes nel marcu del Plan Estratéxicu pal Abordaxe de la Hepatitis, aprobáu pol Conseyu Interterritorial. Nesi contestu, l’Estáu aceptó abrir una llinia de creitu a un interés baxu pa que les autonomíes pudieren encarar los costos y comprometióse tamién a qu’esi gastu nun computare como déficit. “Xusto lo contrario de lo espresao la selmana pasada pol ministru de Facienda, Cristóbal Montoro”, precisó’l conseyeru.

“Ye una vergoña que’l Gobiernu de Rajoy trate de forciar a les comunidaes autónomes a escoyer ente facilitar estos fármacos a los pacientes o introducir recortes nel gastu sanitariu: nel nuestru casu, yá los avisemos de que nun vamos facer nenguna de los dos coses, porque ye l’Executivu del PP el que ta incumpliendo lo aprobao nel Conseyu Interterritorial de marzu del 2015”, amestó Del Busto.

12,5 millones nesti 2016

El Gobiernu del país destinó l’añu pasáu más de 22 millones pal tratamientu farmacolóxicu de pacientes con hepatitis C y ta previsto dedicar anguaño otros 12,5 pa siguir facilitando melecines innovadores contra la enfermedá. El virus de la hepatitis C ye una de les causes principales d’enfermedá crónica hepática nel mundu y responsable d’alredor de la metá de les cirrosis hepátiques y de trés de cada cuatro cánceres de fégadu nel Estáu.

Sicasí, la tendencia nos últimos años, tanto en tol Estáu como n’Asturies, ye l’amenorgamientu paulatín de la infeición, atribuyible a la cuasi eliminación del riesgu de contaxu por tresfusiones sanguínees y hemoderivaos.