Defensores del idioma dan un marxe de confianza a Álvarez-Cascos

Persones venceyaes al movimientu de defensa del idioma dan un marxe de confianza a Fracisco Álvarez-Cascos tres les sos pallabres sobre l’asturianu del Plenu d’Investidura. El llíder de FAC declaró que va desarrollar la Llei d’Usu.
 
El profesor universitariu y presidente de la Fundación Caveda y Nava, Ramón d’Andrés –que prefier dar una valoración a títulu personal y non como representante máximu de la entidá con sede n’Uviéu–, asegura que “el desarrollu de la Llei d’Usu ye una noticia positiva”. Sicasí, apunta que “nun hai más cera que la qu’arde” y que nun pue xulgar les intenciones d’Alvarez-Cascos pa col asturianu hasta que nun vea l’organigrama y les actuaciones del Gobiernu entrante.
 
Carlos Pulgar, voceru de la Xunta pola Defensa de la Llingua Asturiana, señala que’l discursu del llíder de Foro Asturias Ciudadano (FAC) sobre l’asturianu “foi poco significativu; nun dio nengún datu nuevu sobre cuál va ser la so política llingüística”. El representante d’esta organización cívica apunta que tamíen ve positivo que’l Executivu nuevu cumpla la Llei d’Usu y Promoción del Asturianu siempre que sirva pa “desarrollar un marcu xurídicu superior” y califica de “surrealista” qu’Álvarez-Cascos punxera la promoción del castellanu, inglés y chinu perriba de la del asturianu na Universidá, institución a la que reclamó un papel protagonista nel reconocimientu del idioma.
 
“Son unes pallabres bones, pero hai que poneles a furrular”. Ésta ye la opinión de Xosé María Estrada, presidente del Aconceyamientu de Xuristes pol Asturianu, que tamién prefier esperar el desarrollu d’acontecimientos pa dar una opinión más fonda. “La Llei d’Usu ta ehí dende l’añu 1998 y naide miró pa ella nestos 13 años”, apunta Estrada, que considera que la propuesta d’Álvarez-Cascos de desarrollala dafechu “nun suena mal”.
 
Otra manera, l’Asociación Cultural N’Ast asoleyó güei un comunicáu nel qu’aseguren ver nes pallabres del llíder de FAC “un cambiu positivu, pero insuficiente”. El coleutivu de defensa del idioma considera “probes los compromisos llingüísticos del discursu institucional de Cascos” y entiende que “cualisquier midida que nun incluya la oficialidá de la llingua asturiana ye insuficiente y va contra los derechos humanos más ellementales”.“El ‘problema’ de la realidá actual del asturianu nun pue amenorgase a dellos aspeutos institucionales o lliterarios, sinón qu’implica la reconocencia política de los asturfalantes como suxetos efeutivos d’unos derechos humanos y civiles de primer orde como son los derechos llingüísticos”, añade N’Ast.