Decenes de miles de persones salieron a la cai en Llangréu en defensa de la minería del carbón

Más de 50.000 persones, según los sindicatos –cifra rebaxada a 25.000 pola Policía–, salieron a la cai esti llunes en Llangréu en defensa de la minería del carbón y pol emplegu nes zones mineres. CO OO y UXT estudien una ‘marcha prieta’ a Madrid.
 
El secretario d’aición sindical del SOMA-Fitag-UXT, José Antonio Menéndez Barriada, resaltó un siguimientu de la fuelga xeneralizao tanto ente grandes superficies como entre pymes de la zona, y estimó en más de 50.000 persones l’asistencia a la manifestación de esta tarde con salida nel Parque Vieyu de La Felguera y final nel Parque Doráu de Sama baxo’l lema ‘Non al zarru de la minería del carbón. Pol emplegu nes cuenques mineres'. Pela so parte, José Manuel Zapico, de CC OO del Nalón, resaltó el "arguyo de ser y tar nes zones mineras" pol "gran siguimientu" de la fuelga, al tiempu qu’incidió na ausencia d’incidentes a lo llargo d’una xornada de paru "pacífica" que culminó con una "manifestación histórica qu’evidencia’l clamor popular qu’esixe al PP que rectifique".
 
Zapico esplicó que ta prevista una reunión mañana ente los dos sindicatos p’abordar la marcha a Madrid, pa la que tovía nun hai fecha marcada. Ésta sería la tercer vez que los mineros se desplacen a pie hasta la capital castellana: la primera nel 1992 y la última nel 2010.