De visita n’asturianu per Cimavilla y el cascu históricu d’Uviéu

Una de les novedaes de la XXXVIII Selmana de les Lletres son les visites guiaes, tanto pa escolinos como p’adultos, que s’entamen pel xixonés barriu de Cimavilla y el cascu históricu d’Uviéu. Esti miércoles, Grau tamién acueye’l tradicional actu poéticu nel que collabora la Fundación Aula de les Metáfores.

La primer de les visites tuvo llugar ayeri, pela mañana pa neños y neñes, y pela tarde pa los más mayores. A les 19.30 hores, un grupu conformáu por dos docenes de persones salía de la Plaza’l Marqués, onde la estatua de Pelayo, pa percorrer el vieyu barriu pesqueru col acompañamientu de les esplicaciones n’asturianu del guía Denis Soria. El Campu Valdés, la Casa Natal de Xovellanos o’l ‘Elogio del Horizonte’ de Chillida foron dalgunos de los puntos que se visitaron.

Güei, les persones qu’acutaron plaza van poder facer lo propio pel cascu históricu d’Uviéu dende les 19.30 hores, siendo tamién el turnu de los escolinos pela mañana. Una manera prestosa de conocer detalles en llingua asturiana del centru de la ciudá tanto pa propios uvieínos como pa persones de fuera del conceyu.

Tarde de versos

Na segunda xornada de la programación de la Selmana de les Lletres, la poesía va ser protagonista, con actos en Corvera y Grau. A partir de les 18 hores va comenzar nel Centru Cultural de Cancienes l’atopada poética ‘Versovera’, na que collabora la Casa de la Llingua de Corvera, mentes qu’a les 20 hores va pasar a celebrase nel Centru Sociocultural de Les Vegues.

Mentes, la Capiella de los Dolores va acoyer dende les 19.30 hores l’eventu añal que s’entama en collaboración cola Fundación Aula de les Metáfores. Nesta ocasión va consistir nuna llectura poética a cargu d’Ángeles Carbajal; la entrega de diplomes del IV Premiu de Poesía Selmana de les Lletres, na que participen escolinos de Primaria y Secundaria de Grau; y una actuación del alumnáu del Conservatoriu Superior de Música Eduardo Martínez Torner.