De Miguel, Wolfe y Quintana presenten’l so discu ‘Xota pa tres’ nel Teatru Xovellanos

Esti vienres, a partir de les 20.30 hores, va tener llugar nel xixonés Teatru Xovellanos la presentación del primer discu de De Miguel, Wolfe y Quintana. Ésti lleva’l nome de ‘Xota pa tres’ y bebe de la tradición asturiana y el jazz.

Jacobo de Miguel, al pianu; Michael Lee Wolfe, a la guitarra; y Mapi Quintana, a la voz, presenten esti primer trabayu d’un tríu que pretende asentarse y traer un aire fresco a la música asturiana. Pa ello ufren la so visión propia de la música del país amestando’l folk col jazz. Un trabayu novedosu que presenta doce cantares de composición propia, tradicionales y traducciones al asturianu, como ‘Ain’t got no home’ de Woody Gurthrie –tornáu como ‘Perdí la mio casa’–, o dos cantares basaos en poemes árabes.

Nel conciertu d’esta tarde, que tien un preciu de 12 euros, los trés músicos, amás d’interpretar tolos temes de ‘Xota pa tres’, van esplicar la historia que guarda caún de los doce cantares del discu.