De Mandilín actúa esti xueves na plaza la Ilesia de Colunga

La bandina De Mandilín va dar una actuación esti xueves en Colunga. El conciertu ta enmarcáu dientro de los XVI Alcuentros cola Cultura Tradicional d’Asturies, qu’esta fin de selmana van tar protagonizaos por un mercáu tradicional.
 
El cuartetu formáu por Pablo Pumarada (tambor y percusión), Daviz Varela (acurdión y guitarra), Pedro P. Sanjurjo (gaita, xiblates y gaita rabil) y Dani García de la Cuesta (vigulín) va tocar frente a la ilesia de Colunga a les 20.30 hores. Nel conciertu, los cuatro músicos veteranos de la escena folk, que collaboren o trabayen en delles formaciones y escueles de música tradicional, van interpretar temes asturianos y d’otros puntos del mundu celta.
 
Esta actividá ye una de les munches que vive Colunga dientro de los XVI Alcuentros cola Cultura Tradicional. Pal sábadu y domingu ta previsto la celebración del VII Mercáu Tradicional nos Alcuentros, con puestos artesanos y de comida, actuaciones de grupos folclóricos, teatru, xuegos tradicionales y un festival de tonada na primer xornada (21.30 hores) nel que tamién va haber sitiu pa los monólogos. D’igual forma, les persones que s’averen a esti conceyu na segunda quincena de xunetu van poder visitar una esposición na Casa la Cultura col nome ‘La gaita n’Asturies’.