De la Calle lleva per primer vez el Premiu Alfonso Iglesias de cómic

Error message

  • Notice: Undefined index: boostpath in include_once() (line 259 of /var/www/clients/client1/web2/web/sites/default/settings.php).
  • Notice: Undefined index: boostpath in include_once() (line 260 of /var/www/clients/client1/web2/web/sites/default/settings.php).
|
Ángel de la Calle

‘Paez que nun foi ayeri’ foi la obra escoyida pol xuráu como merecedora del XIII Premiu Alfonso Iglesias de cómic, el primeru de los Premios Lliterarios 2021 que se falla. El so autor ye Ángel de la Calle, direutor de la ‘Semana Negra’, que lleva per primer vegada esti gallardón.

“El bon usu de los recursos del llinguaxe del cómic, la madurez y l’equilibriu que presenta, la intriga que crea la historia, les referencies metalliteraries al mundu del cómic, la fidelidá y l’interés históricu, amás de la calidá llingüística del trabayu” son los aspeutos que rescamplen les persones encargaes de valorar les obres presentaes a esti premiu con una recompensa de 6.000 euros. El xuráu tuvo formáu poles profesores Tamara Collar y Carmen Peña Calvo; la ilustradora, autora de cómics y filóloga Claudia Elena Menéndez; la historiadora del Arte, Mercedes Menéndez; y el dibuxante y ganador de la edición del añu pasáu con ‘El sol na escombrera’, Alberto Vázquez, actuando como secretaria Laura Marcos, filóloga de la Direción Xeneral de Política Llingüística, y como presidente Antón García, direutor xeneral.

Natural de la población salmantina de Molinillo de la Sierra y residente en Xixón dende neñu, De la Calle ye un escritor y ilustrador que tien espublizada les noveles gráfiques en castellanu ‘Modotti. Una mujer del siglo veinte’, y ‘Pinturas de guerra’, cola que llogró nel 2018 el premiu a la Meyor Obra d’Autor Español del Saló Internacional del Còmic de Barcelona, siendo tornaes a dellos idiomes. Tamién tien collaborao coles espublizaciones ‘Zona 84’, ‘El Víbora’, ‘Comix Internacional’, ‘Rambla’ o ‘Heavy Metal’, y ye direutor de la xixonesa ‘Semana Negra’ dende’l 2012.

El doble de trabayos presentaos

El xuráu del Alfonso Iglesias destacó tamién la calidá de les propuestes presentaes y la alta participación d’esti añu, que dobla a la d’ediciones anteriores. En feches próximes la Conseyería de Cultura, Política Llingüística y Turismu va fallar el XIV Premiu María Josefa Canellada de lliteratura infantil y xuvenil, el XXVII Premiu Xuan María Acebal de poesía, el XXVII Premiu Máximo Fuertes Acevedo d'ensayu y el XLII Premiu Xosefa Xovellanos de novela.

De cara al segundu semestre del añu van convocase los dos gallardones nuevos que s’estrenen esti 2021: el Premiu Florina Alías a la meyor traducción al asturianu y el Premiu Xoven Enriqueta González Rubín de narrativa, destináu a menores de 30 años. Ésti últimu va contar con una recompensa de 3.000 euros.

Contador Estadistiques