David Varela va conducir en Llaranes un taller didáuticu d’instrumentos musicales populares d’Asturies

Los xueves 5 y 12 d’avientu va celebrase un taller diáuticu d’instrumentu musicales populares d’Asturies nel Aula Didáutica de Cultura Popular Asturiana, en Llanares. David Varela va ser el conductor del mesmu.

L’Asociación Cultural Escontra’l Raigañu entama esta iniciativa que va protagonizar el músicu de La Bandina y integrante del coleutivu. Nél, los asistentes van averase a una montonera d’instrumentos tradicionales, como los pandeiros, les xiblates, l’acurdión, la gaita, el violín, la zanfona, el tambor o la bandurria, ente otros, conociendo les sos formes, los sos usos y los sos materiales. Amás, nestes dos xornaes, que van desendolcase de 18 a 20 hores con entrada llibre hasta completar aforu, van poder velos, sentilos y tocalos. La intención d’Escontra’l Raigañu ye la de dar continuidá a los talleres nel tiempu con clases dedicaes dafechu a caún d’ellos, pa lo que se contará con conocíos musicos especializaos en cada instrumentu.

Coincidiendo con estes clases, el coleutivu avilesín convida a tola ciudadanía a visitar l’Aula Didáutica de Cultura Popular, asitiada na tercer planta del Centru Municial d’Asociaciones, en Llaranes, y inaugurada’l 12 de payares. Asina, podrán conocer esti aula d’estudiu-muséu de les tradiciones asturianes y la muestra, n’esposición hasta’l 16 d’esti mes, ‘Vezos y costumes d’antaño. Formes de vistir, maneres de vivir’. Les instalaciones tán abiertes los llunes y los xueves n’horariu de 18 a 20 hores.