David Guardado fai un repasu críticu a les cróniques asturianes na charra mensual d'Ástura

'Asturies y Spania na alta edá media' ye'l nome de la conferencia que va poner l'autor de 'Nunca vencida' nel Atenéu Obreru de Xixón.

David Guardado ye'l convidáu del mes marzu d'Ástura pa protagonizar una charra sobre cultura asturiana nel llar social de la entidá, asitiada na segunda planta de la Escuela de Comerciu. El filólogu y ensayista va centrar la so intervención, programada pa mañana a les 19 hores, con accesu llibre hasta completar aforu, en facer un repasu críticu a les cróniques asturianes.

"Les principales fontes utilizaes pa conocer el Reinu d’Asturies son les llamaes cróniques del ciclu historiográficu d’Alfonso III, o cróniques asturianes; unos testos nos que se reflexaríen de forma cuasi lliteral, según la historiografía tradicional, los acontecimientos de los sieglos anteriores a la so redacción y nos que s’amosaría la perspectiva ideolóxica neogótica de los monarques asturianos, especialmente d’Alfonso III, que sería’l redactor o l’inspirador directu de, a lo menos, una d’elles", espliquen dende l'asociación cultural.

"Esa historiografía rellacionada col discursu de la ideoloxía nacionalista dominante especialmente nos sieglos XIX y XX pretendió ufiertanos una llectura unívoca y tresparente de la supuesta ideoloxía d’Alfonso III –la dominante n'Asturies de les dos últimes décades del sieglu IX– y que podríemos resumir na esistencia, que conoceríemos pol testu de les cróniques, d’un proyectu d’unificación política peninsular sofitáu nuna ideoloxía neogótica que s’intuiría yá dende’l sieglu VIII pero que s’amosaría yá desarrolláu espresamente nestes cróniques a final del sieglu IX", añaden al tiempu que rescamplen que "estes llectures, afitaes nel imaxinariu popular, yá tán práuticamente desaniciaes nel mundu académicu, pero resurden con puxu anguaño nes corrientes ideolóxiques y lliteraries que surden del nuevu nacionalismu español".

Na conferencia Guardado va repasar el "contestu de producción de les cróniques, amosando aspectos que puen resultar poco conocíos y parando n’episodios como’l diálogo de Pelayo y Oppas y Cuadonga. Vamos ver asina cómo les coses, munches veces, son mui distintes a cómo nos les contaron".