David Fernández: “Los llibros que más se venden son los de creación lliteraria y el diccionariu”

David Fernández Fernández (Candás, 1981), miembru de la secretaría téunica de l’ALLA, tien ente les sos funciones na UABRA la venta de llibros de la institución académica. Los de creación lliteraria y el diccionariu son los más demandaos.

¿Cuál ye’l so llabor na Universidá Asturiana de Branu?
 
Llevar el funcionamientu en xeneral: situar a los profesores nes sos habitaciones, llevar partes… Pue dicise que cuando toi nel colexu soi como un bedel. Amás, tamién m’ocupo de la venta de llibros de l’Academia.
 
¿Los alumnos interésense polos llibros?
 
La verdá ye que sí. La biblioteca que tenemos equí instalada permite-yos ver tolos llibros de l’Academia, tastialos, polo que les ventes son muncho mayores qu’en cualquier otra época del añu. Tenemos a la so disposición toles publicaciones de l’Academia y, pal cursu de gallego-asturianu, una pequeña amuesa de llibros pa que sepan pa que sepan los materiales que van saliendo. Hai que destacar que los precios son un 20 por cientu más baratos mientres la UABRA que’l restu del añu.
 
¿Cuáles son los que meyor se tán vendiendo?
 
Los de creación lliteraria y el diccionariu. Tamos vendiendo muncho llibros de Pablo Rodríguez Medina y de Xurde Fernández, amás d’el Xeitu.
 
¿Qué tal ye l’ambiente de la UABRA?
 
Ye un ambiente mui prestosu. Son xente mozo que vien a estudiar y al que-yos gusta salir. La convivencia ye mui sana y llevámonos toos bien. Animo a tola xente a que venga equí a facer los cursos de branu. Amás del bon ambiente, los cursos tienen una bona calidá d’asturianu. El que s’apunte per primer vez y nun fale n’asturianu, va acabar falándolo porque tamos toos xuntos y ye’l nexu de conexón. Inclusive, l’añu pasáu tuvimos ente los alumnos a un xaponés que falaba asturianu perbién.