Datos esperanzadores pal osu n'Asturies

El Grupu de Trabayu del Osu Pardu del Ministeriu de Mediu Ambiente ta acabante d'asoleyar unos datos bien d'esperanzadores sobre la evolución demográfica d'esta emblemática especie nel noroeste peninsular. Según datos del mentáu Grupu de Trabayu , anque la suba ye pel momentu tovía "modesta y fráxil", hai llugar pa falar d'un optimismu moderáu en cuantes a la tendencia poblacional del osu pardu, gracies a la llixera recuperación rexistrada nos años 1999, 2000 y 2001, cada un con 8, 9 y 8 osos con cría, respectivamente.

Estos datos contrasten enforma colos correspondientes a la población osera del Pirinéu, que carez de problemes demográficos y xenéticos más graves tovía. Ensin embargu, el Grupu de Trabayu del Osu Pardu encamienta a les comunidaes autónomes de Galicia, Cantabria y Castilla y Llión a adaptar urxentemente los sos respectivos Planes de Recuperación del Osu a los criterios de la Comisión Nacional de Protección de la Naturaleza, aprobaos n'ochobre de 1999. Asturies ye hasta agora la única que yá aprobó la revisión del so plan propiu, en febreru d'esti añu. Ente les midíes recoyíes sobresal una, la delimitación d'áries nomaes "crítiques", qu'ha valir pa tornar l'impactu humanu sobre la especie, plantiando soluciones a les amenaces pola construcción de infraestructures, la xestión forestal inadecuada y los efectos
del turismu. D'otru llau, plántiase tamién la posibilidá de restrinxir la caza d'iviernu nes aries crítiques, una midida que n'Asturies yá fo adoptada nel conceyu de Somiedu, depués qu'un cazador -y diere a un esbardu na pasada temporada.

Na situación relativamente meyor que vive l'osu pardu n'Asturies--sobremanera énte les nuestres comunidaes vecines--nun podemos escaecer l'importante trabayu de sensibilización que dende hai años vien faciéndose dende organizaciones como FAPAS y la Fundación Oso Pardo.