Darréu sal al monte en defensa de la ñatura

|
Cartelu II Marcha en Defensa de la Ñatura Darréu

La organización moza soberanista entama una marcha peles Foces del Llaímu.

La II Marcha Moza en Defensa de la Ñatura va partir a les 10.30 hores del aparcamientu asitiáu a la entrada de Soto pa entama esta prestosa ruta conocida anguaño como la del Alba. Amás de caleyala, los participantes van poder participar en actividaes y talleres que Darréu va organizar pente'l percorríu sobre ecoloxismu.

"Baxo’l mitu del 'Paraísu Natural' atopamos agresiones constantes al nuesu entornu natural, y al mediu ambiente. Llinies d’alta tensión, centrales térmiques, amenaza de nueves esplotaciones mineres auríferes, flora y fauna autóctono amenazao, proyeutos de banzaos o incineradores que nun quedaron torgaos dafechu, el retornu del fracking o los alarmantes niveles de contaminación nel aire, son dalgunes de les amueses más importantes", espliquen dende la organización moza, que, "col enfotu de siguir faciendo conciencia d’esta realidá, y tamién de conocer meyor l’entornu natural del nuesu país" entama una nueva Marcha Moza en Defensa de la Ñatura.

Inscripción previa

L’actividá ye accesible y abierta a tol mundu, siendo necesario llevar ropa afayadiza pa esti tipu d’actividá, asina como daqué pa xintar. La condición única ye inscribise de forma previa, pa una organización meyor, nel corréu electrónicu darreu.moceda@gmail.com, apurriendo nome, apellíos y teléfonu de contautu p'avisar si fora necesario suspender la marcha por mal tiempu. Nel casu de nun disponer de mediu de tresporte pa dir a Sobrescobiu, recomiéndase contautar con Darréu, que va tratar de facilitalu a tolos interesaos.

Contador Estadistiques