Darréu entama un alderique sobre la prostitución vista dende postures feministes

Va celebrase'l xueves nel Llar La Llegra, que'l vienres acueye un mercadín y una esposición y intercambiu de pegadielles polítiques.

Les estudiantes de Promoción d'Igualdá de Xéneru, Silvia Fernández y la venezolana Karelis Contrera, ésta última tamién miembru de l'Asociación Comunitaria El Ariete, van ufrir una charra baxo'l nome de 'Prostitución. Diferentes postures dende'l movimientu feminista', pa depués abrir un alderique colos presentes cola fin de que puedan apurrir la so visión sobre esti tema. "Queremos cuntar con voces y posicionamientos diversos, col envís d'aldericar, conocer, cuestionanos, y siguir formándonos pa construyir dende la mocedá una Asturies llibre, inclusiva, igualitaria y emancipatoria", apunten dende Darréu.

La charra-alderique va tener llugar esta tarde, a partir de les 19 hores, en La Llegra. Esti llar uvieín, precisamente, va acoyer mañana, ente les 19 y les 22 hores, una esposición de pegadielles polítiques, sociales y sindicales, polo que s'anima a tola xente aficionao a que traiga les de so, cola posibilidá d'intercambiales con otres persones.

Esta xornada, na que tamién va haber un espaciu pa la venta de material de coleutivos, va servir d'igual forma pa presentar la pegadiella nueva de La Llegra cola qu'ayudar a financiar la so actividá. Van poder mercase 10 d'elles a un preciu d'un euru.