Darréu convida a Ruchar pa falar sobre la situación actual del lleonés

|
Cartelu Xornada Asturllionesa de Darréu

La organización asturiana va repetir visita al País Lleonés la selmana qu'entra.

Dientro d'una 'Xornada Asturllionesa', coincicidendo cola cercanía del Día Internacional de la Llingua Materna (21 de febreru, martes), Darréu va proyeutar un documental y va entamar una charra alrodiu la situación llingüística del lleonés, pa lo que convidó a la organización moza lleonesista Ruchar. Va ser mañana, de magar les 19 hores, nel uviedín Espaciu La Llegra.

La proyeición de 'Llionés, la llingua llionesa', el documental emitíu n'avientu pola canal privada de calter autonómicu Radio Televisión Castilla y León, fechu pola productora Rici Comunicación y Promoción, y que da un bon tratamientu al idioma va abrir la xornada. Depués va celebrase la charra de militantes de Ruchar, cola intención d'abrir de siguíu un alderique "sobre semeyances y diferencies na situación d’Asturies y el País Llionés, intercambiar esperiencies, y en definitiva ser quien a arriquecer les nueses lluches".

Xornada de la Llingua Materna

Los miembros de Darréu, mentes, van treslladar a los lleoneses la situación del asturianu anguañu'l sábadu 25 dientro de la Xornada de la Llingua Materna qu'entama Ruchar nel Centru Social Okupáu El Faro, asitiáu en Sanandrés del Rabanéu. La charra va tener llugar a les 19 hores, pero enantes va habar un comedor veganu (15 hores) y un taller d'entamu al lleonés (17 hores).

Van completar les xornaes el I Certame de Poesía Combativa en Llionés (21 hores) y una pinchada de música del País Llionés (21.30 hores).

Contador Estadistiques