Darréu robla un manifiestu xunto con otres organizaciones coincidiendo col aniversariu de la Constitución

Organizaciones moces soberanistes del Estáu, ente elles Darréu, celebraron el vienres una rueda de prensa conxunta na madrilana Plaza de Oriente, too un símbolu del franquismu. Criticaron les consecuencies d’una Constitución “impuesta”.

Responsables de Darréu, Arran (Països Catalans), Azarug (Canarias), Briga (Galicia), Ernai (Euskal Herria), Isca! (Galiza), Jaleo!!! (Andaluzia), Purna (Aragón) y Yesca (Castilla) participaron nesti actu col qu’este organizaciones moces pretenden amosar les sos bones rellaciones y l’enfotu común n’apostar pol “soberanismu, el socialismu y el feminismu” como pegollos cimeros “pa derrocar al réxime qu'oprime a los nuesos pueblos”. Asina, acompañaos por una pancarta que rezaba ‘Somos vuestra pesadilla’ y poles banderes de caún de los países, lleeron un manifiestu xunitariu coincidiendo col 35 aniversariu de la Constitución nel que criticaron la ‘Transición’, calificándola de “transacción de poderes”. Tamién alertaron de la situación “crítica” na que s’atopa la mocedá “de los nuesos pueblos”, con precariedá llaboral, desemplegu, exiliu, elitización del sistema educativu, empobrecimientu y mercantilización de los llugares y actividaes d'ociu, ente otres cuestiones.

D’igual forma, anunciaron “la nuesa confluencia estratéxica, siempres dende'l respetu y reconocencia a les dinámiques que marquen el trabayu en cada territoriu, y por tanto, a la soberanía de toes elles” y la so “firme decisión d'avanzar per esti camín d'ilusión y esperanza. Y especialmente, de facelo col internacionalismu por bandera, sabiendo que la deconstrucción de tol entramáu institucional del Réxime, de la economía criminal y de les mentalidaes obsoletes tien que ser una xera compartida por toes y tolos que creemos na xusticia social”.