Darréu pide dignificar la memoria del Conseyu Soberanu d'Asturies y Lleón

El pasáu sábadu cumplióse'l 76 aniversariu de la declaración de soberanía del Conseyu d’Asturies y Lleón, el 24 d'agostu de 1937. Dende la organización de la mocedá Darréu piden que s'honre la memoria d'esti acontecimientu.

El Conseyu Soberanu d’Asturies y Lleón nació'l 24 d'agostu de 1937, en plena Guerra Civil, presidíu por Belarmino Tomás y con see na Casa Blanca de la Plaza’l Parchés de Xixón. De calter obreru y progresista, tomó midíes de control n'aduanes y fronteres, caltuvo la emisión de moneda y sellos propios, entamó un sistema xudicial non dependiente del Gobiernu Español y llegó inclusive a pidir l'ingresu na Sociedá de Naciones.

Dende Darréu, piden que se reconoza esta fecha y se dignifíque la so memoria, considerándola un episodiu históricu pal soberanismu asturianu. Pa la organización de la mocedá, los partíos políticos que participaron nel procesu fai 76 años traten agora de borrar la memoria de dichu acontecimientu “por qu'atenta contra la so ideoloxía españolista y centraliega” y les sos polítiques económiques “son contraries a la so ideoloxía reformista y favoratible a los privilexos de clas”. La organización proclama que “tenemos de puxar pola nuesa hestoria común y facer alcordanza d'unos fechos tan importantes, tomando exemplu y caminando xuntos/es haza una nueva Asturies, como la del Conseyu, que s'empobine haza la so soberanía nacional y el socialismu”.