Darréu fai acciones contra’l pieslle de Duro Felguera

Militantes de la organización de mocedá nacionaliego Darréu, desendolcaron esti fin de selmana delles acciones en sofitu a los trabayadores de Duro Felguera. Los nacionalistes refuguen l’ERE qu’afectaría a un 60% de la plantiya.

Pintaes, pancartes y otres acciones propagandístiques fueron les realizaes por Darréu mientres esti fin de selmana. La organización de mocedá amosó la so solidarida colos trabayadores de los talleres de Barros por mor del ERE que tienen enriba; un ERE qu’afectaría a 90 trabayadores de 150 que tien l’actual plantiya.

“L'únicu fin que la patronal busca ye'l pieslle de la factoría pa dedicase a la especulación. Asina 90 families puen quedar na cai, y el Conceyu de Llangréu nuna situación llaboral inda más llaceriosa de la que vive anguaño”, denuncien dende Darréu.

D’esti mou, la organización soberanista y socialista aseguró que nun van “quedar paraos” mientres “arramplen” el texíu productivu d’Asturies y Llangréu. “Si'l conflictu nun s'igua nun duldaremos en siguir realizando dende les nueses posibilidaes acciones d'esti tipu, a la par qu'informatives”, indiquen.

“Hipocresía” del PSOE
Darréu tamién sorrayó “el papel hipócrita del gobiernu local del PSOE”. Según la mocedá nacionaliego, l’agrupación socialista de Llangréu tendría “escuros intereses pactaos cola empresa en dellos terrenos del conceyu, propiedaes anguaño de la Duro”.