Darréu entama una xornada “por una mocedá combativo y crítico” nos llocales de la CSI n’Uviéu

Esti vienres va tener llugar nos llocales de la CSI n’Uviéu la Xornada por una Mocedá Combativo y Crítico. Esti actu de Darréu busca crear un espaciu reflexivu y formativu ente la xente mozo, amás de facer alcordanza d'ochobre del 1934.

“Con esta xornada dende Darréu queremos averar a la mocedá un mensaxe críticu y una actitú combativa p'afrontar la dura situación que vive'l pueblu asturianu anguaño. Les agresiones a Asturies, a nivel políticu, socioeconómicu o cultural, son el día a día y la mocedá asturiano va ser la principal víctima de les polítiques capitalistes y españoles que traten d'hipotecar el nuesu futuru. Pero entá queda mocedá que nun se resigna y sigue lluchando pol futuru”, señala la organización soberanista nun comunicáu. Tola actividá va centrase’l vienres y va principiar, a les 18.30 hores, con una charra-alderique de Santi Fano que lleva’l nome de ‘Internet, les redes sociales y el control sociopolíticu’ y que va tratar “sobre la utilización que los poderes político-económicos faen de la rede y como controlen l'activismu y la vida privada de la xente al travíes de les redes sociales”.

Pa les 20.30 hores ta previsto un actu políticu, tamién en formatu de charra-alderique (‘¿Paru o emigración? ¡Escoyemos Revolución!’), nel que la organización quier espresar la so posición énte la situación de la mocedá asturiano y proponer alternatives pa iguar el futuru coleutivu d'Asturies, pa finar depués la xornada con un pinchéu con precios populares y música del país. Dende Darréu llamen a tola xente mozo a participar nestes actividaes “col envís de crear un espaciu formativu, reflexivu, críticu y d'averamientu pa sumar fuercies na llucha pola soberanía política y económica d'Asturies”.