Danse a conocer los ganadores del concursu '¡Yes Youtuber!'

El xuráu destacó "la bona calidá de les pieces que participaron nesta primer edición".

La plataforma PlayPresta y Cuatro Gotes Producciones entamaron en febrero el concursu '¡Yes Youtuber' col oxetivu d’afalar y visibilizar l’usu del asturianu en toa triba de videos en formatu de programes per Internet. Ente tolos trabayos presentaos, los realizadores audiovisuales Daniel Rodríguez Blanco y Lluis Fanjul; Nuria López García, direutora comercial de PlayPresta; la estudiante d'Audiovisuales, Rebeca Montoto; la estudiante de Marketing, Alba García Fernández; y el periodista Iván Llera, col director de PlayPresta, Inaciu Galán, como secretariu, escoyeron los merecedores de llevar esta primer edición nes sos diferentes estayes.

Eva Cameán, con 'Retu-xuegu: tienes esti llibru nel to estante?' fíxose col Premiu al Meyor Videu de Mocedá hasta 35 años. Mentes, nes categoríes escolares, 'Tipos de profesores', del alumnáu de quintu A del CP San José de Llanera, con Clara María Fernández González como profesora, consiguó’l Premiu al Meyor Videu d’Educación Primaria; y 'Voi volar', del alumnáu de primeru C de la ESO del IES Carmen y Severo Ochoa de Ḷḷuarca, con Claudia Gutiérrez Lueje como maestra, el Premiu al Meyor videu d’ESO y Bachilleratu.

Tamién entregáronse reconocencies especiales a la Eficiencia Comunicativa ('Reseña Clarión: Autores. Pablo Rodríguez Medina', de Cameán), a la Calidá Téúnica ('Analís BSO Wrath of the Lich King', de Daniel Suárez Díaz 'Dan'), a la Calidá Llingüística ('La vida de López de Vega en 5 minutinos, d'Alma, videu unviáu ensin facese públicu) y a la Orixinalidá ('Espresiones pa manexase pela Cuenca Bona', del alumnáu de terceru de la ESO del IES Juan José Calvo Miguel, de Sotrondio, dirixíos pol profesor Xavi Cayao).

Na semeya, captura del videu ganador na estaya de Mocedá hasta 35 años, fechu por Cameán.