Danone incorpora l'asturianu na promoción de los sos productos

Iniciativa pol Asturianu felicita a la firma francesa por ello y valora que cada vez más empreses usen l'idioma pa "coneutar d’una manera más direuta colos veceros".

Danone ta publicitando en grandes superficies los sos productos llácteos con un testu grande qu'acompaña'l logu pol so centenariu, cumplíu nel 2019, que rescampla "cola lleche fresca de 50 granxes familiares asturianes" (sic). La promoción sigue con un testu d'un ganaderu d'una d'eses granxes, tamién n'asturianu, anque emplega la toponimia castellanizada, yá derogada.

A pesar d'estos detalles, Iniciativa pol Asturianu valora'l pasu dau por Danone, que sigue'l mesmu camín qu'otres firmes de fuera d'Asturies qu'empleguen la llingua asturiana na so publicidá nel país. “Celebramos que la llingua asturiana tea presente nel marketing d’una empresa tan importante nel sector alimentariu pola visibilidá que-y da al idioma", apunta Inaciu Iglesias, vocal d’Empresariáu de la organización, qu'aprovecha pa felicitar el xestu de la sociedá nacida en Barcelona.

“Confírmase, una vegada más, que l’usu de la llingua asturiana por parte de les empreses resulta positivo porque permite coneutar d’una manera más direuta colos veceros”, sigue Iglesias, que considera "una bona noticia comprobar qu’empreses de diferentes sectores productivos utilicen l’asturianu na so actividá comercial y nes campañes publicitaries. Ye mui importante porque tamién supón normalizar l’idioma”.

Nesi sen, Iniciativa pol Asturianu, que lleva dende la so fundación "insistiendo na importancia de la llingua asturiana nel ámbitu empresarial", nun fai otra que confirmar que l'idioma "ye un elementu de creación empresarial y, polo tanto, de riqueza. Y ye qu’amás la llingua asturiana puede ser un elementu de diferenciación y qu’aporta valor añadíu a los productos y servicios qu’ufierten les empreses".