Daniel García Granda espubliza ‘Poemes del últimu salvaxe’

L'escritor polesu Daniel García Granda, con cuatro poemarios espublizaos en castellanu, ta acabante d’asoleyar el so primer llibru n’asturianu: ‘Poemes del últimu salvaxe’. Esta obra va presentase’l xueves nel Auditoriu de La Pola Siero.
 
El poemariu, asoleyáu por Ediciones La Baragaña, ta ambientáu nel pueblu yerbatu de Viñái, onde l’autor tien los sos raigaños. Nel llibru, con prólogu del músicu Nacho Vegas, l’autor reivindícase como l’últimu salvaxe nunos poemes que miren pa la tierra pa poder ver depués pal restu’l mundu.
 
García Granda (La Pola Siero, 1972) ye llicenciáu en Filoloxía Inglesa, cursando estudios nes universidaes d’Uviéu y del Ulster. Collaborador habitual del diariu El Comercio, tien yá espublizaos cuatro poemarios, toos ellos en castellanu, y ganó dellos gallardones lliterarios nesta llingua con poemes como 'Definición de biografía' y 'Que se corra la voz y, sobre todo, que se corra la voz' (coles que ganó en dos ocasiones el Premio Internacional de Poesía Ciudad de Lepe), y 'Cómo desaparecer completamente' (Premio Águila de Poesía). Esti xueves va presentar na sala de Cámara del Auditoriu de La Pola la so primer creación n’asturianu nun actu previstu pa les 20 hores.