Daniel Fernández pasa a ocupar el cargu de voceru nacional de Compromisu por Asturies

|

La federación de partíos Compromisu por Asturies celebró’l sábadu en Xixón un conceyu abiertu nel qu’anovó la so executiva. Daniel Fernández ye’l voceru nacional nuevu de la organización, sustituyendo nel cargu a Yolanda Huergo.

Esti cambiu que tuvo llugar en conceyu abiertu –muérganu máximu de Compromisu ente conceyos– vien “dempués de que les compañeres y compañeros de l'anterior executiva punxeren en marcha tolos elementos necesarios por que Compromisu pueda realizar la so actividá, como colofón del procesu de federación ente Bloque por Asturies y Unidá Nacionalista Asturiana, cola integración de les persones independientes que se xunieron al procesu”, afirma Fernández, que resalta que “esti trabayu yera fundamental pal nuesu funcionamientu, pero pocu visible pa munchos militantes”, un llabor que l'actual executiva va poder rentabilizar “políticamente, polo que nun podemos más qu'estimar l'esfuerzu que fixeron de forma tan xenerosa”. D’igual forma, el hasta agora voceru de Compromisu en Xixón espera poder devolver la confianza de los sos compañeros “trabayando tantu pa parar la política de retayos que lleven a Asturies a una situación más dura que nos peores años de la reconversión industrial, como por que recuperemos el nuesu pesu políticu ante'l nuevu procesu territorial que se ta abriendo, onde tenemos de tener una voz propia non supeditada a intereses ayenos a la nuesa tierra”.

Fernández, que resultó escoyíu por unanimidá, nacíu en Xixón nel añu 1978 y ye llicenciáu en Ciencies Polítiques y de l’Alministración y espertu en Procesos Políticos Contemporáneos (Diploma d’Estudios Avanzaos). Tamién cuenta con un Máster de Auditoría Financiera, títulu d’Espertu Universitariu en Derechu Tributariu y d’Espertu Universitariu na Práutica Llaboral, y trabaya anguaño como alministrador de finques.

 

Contador Estadistiques