Dani García de la Cuesta y Ángel B. Villa coordinen unes xornaes sobre etnografía y música tradicional nel RIDEA

Juan Alfonso Fernández García, Xosé Ambás, Chus Solís y Rodrigo Joglar, y el propiu García de la Cuesta van poner les conferencies.

Les 'Jornadas sobre Etnografía y Música Tradicional' van contar como charra inaugural esta tarde la intervención 'El Museo de la Gaita de Gijón: un espacio para conocer la música asturiana' a cargo del so direutor, Fernández García. Nella va facer un repás fotográficu pola historia, coleiciones y xeres de la instalación asitiada nel Muséu del Pueblu d'Asturies.

El xueves viniente va ser el turnu de Xosé Antón Fernández 'Ambás' con 'Música tradicional. Trabajo de campo e investigación', mentes que'l siguiente, día 16, Daniel García de la Cuesta va falar de 'La imagen de la música y los músicos en la historia de Asturias: iconografía'. Van pesllar les xornaes Solís y Joglar el 23 con 'La construcción y didáctica de instrumentos tradicionales en Asturias'.

Toles conferencies, que tán coordinaes por García de la Cuesta y Ángel B. Villa, van entamar a les 19 hores, con entrada llibre, y van tener llugar nel salón d'actos del Real Instituto de Estudios Asturianos (RIDEA), qu'editó un cartelu en castellanu dafechu que nun respeta la toponimia.