D'Andrés va tratar nel RIDEA sobre la influencia del eusquera nes xírigues

|
RIDEA

La conferencia completa’l ciclu 'Palabres d’Asturies, testigos de cultura'.

'La influencia del euskera en la xíriga y otras jergas gremiales de Asturias' ye'l nome de la intervención que Ramón d'Andrés va ufrir esta tarde nel salón d’actos del Real Instituto d'Estudios Asturianos (RIDEA). El profesor universitariu ye'l coordinador d'esta iniciativa sobre filoloxía asturiana que comenzó l'añu pasáu y qu'esti mes siguió con una charra de Xulio Concepción sobre 'Léxico asturiano, toponimia y terminologías científicas-técnicas'.

"Les xergues gremiales d'Asturies (xíriga, mansolea, bron, etc.), igual qu'otres del noroeste de la Península, sirviéronse del eusquera pa conformar una parte sustancial del so repertoriu léxicu crípticu. Amás de precisar qué tipu de léxicu vascu entrós nes nueses xergues gremiales y qué incidencia tuvo nelles, ye tamién oxetu d'esta conferencia llamar l'atención sobre dalgunes cuestiones de métodu que s'ilustrarán con exemplos llamativos de les tresformaciones que sufrieron dalgunos vocablos vascos en boca de falantes de xergues gremiales asturianes", reza'l programa.

La ponencia de D'Andrés va comenzar a les 19.30 hores, con entrada llibre. Esti ciclu ye una iniciativa del RIDEA en collaboración col Seminariu de Filoloxía Asturiana de la Universidá d'Uviéu.

Contador Estadistiques