D'Andrés presenta novedaes sobre l'estudiu de la llende ente l'asturianu y el gallegu

Dientro del ciclu de conferencies del RIDEA 'Los estudios filolóxicos asturianos, güei'.

Baxo'l nome de 'La frontera xeográfica del asturianu pel occidente', Ramón d'Andrés va presentar aportaciones novedoses "al estudiu de la llende llingüística ente l’asturianu y el gallegu, apoyaes nun proyectu d’investigación ellaboráu nel occidente d’Asturies". Va ser a les 19.30 hores na sede del RIDEA (Palaciu Conde Toreno, Uviéu), con entrada llibre hasta completar aforu.

Ésta trátase de la segunda de les cuatro charres programaes pol Real Instituto de Estudios Asturianos (RIDEA) y coordinaes pol propiu D'Andrés en collaboración col Seminariu de Filoloxía Asturiana (SFA). La primera d'elles protagonizóla Xulio Viejo y nos dos xueves próximos van participar Xuan C. Busto (día 10), con una conferencia sobre los inicios de la lliteratura asturiana, y Antón García (día 17), que va falar de la obra del Padre Galo.