Dan-y'l Premiu Príncipe a Woody Allen

La candidatura del director de cine Woody Allen ta acabante de ganar el Premiu Príncipe d'Asturies de les Artes, que se decidió a les doce d'esta mañana. La candidatura d'Allen propúnxola'l director de cine Gonzalo Suárez, anque otros dos nomes que sonaron bastante foron el del pintor Pablo Palazuelo y el del escultor americanu Richard Serra. Allen Stewart Konigsberg, más conocíu por Woody Allen, nació en Brooklyn en 1935. Orgullosu de Nueva York y enamoráu d'Europa (va años que toles sos películes estrénense en festivales europeos), Allen ye responsable lo mesmo de comedies como "El Dormilón" o "Bananas" que de películes dramátiques tipo a les d'Ingmar Bergman, ún de los sos favoritos. La obra d'Allen, que yá llega a los 34 títulos como director, tamién inclúi cintes con un aquello más personal, como la que-y dedicó al so barriu de nacencia, "Díes de Radio" o como'l falsu documental de 1983 "Zelig", en que Allen facía'l papel d'un ser ensin personalidá propia que copiaba la manera de comportase de quien tuviere más cerca.Cola cantidá de seguidores que tien Allen nel mundu entero, nun ye d'estrañar qu'abunden los webs sobre la so vida y obra, asina qu'habrá que peñerar un poco ente tolo qu'hai. Por poner un casu, l'islandés Jóhannes Benediktsson, tien compráu el dominiu www.woodyallen.com. El diseñu ye bastante curiosu, anque nun desmerez tampoco www.woodyallen.de, que tamién da más conteníos (pa quien entienda l'alemán). Una curiosidá, la consulta "Woody Allen" en Google devuelve 428.000 rempuestes.…

Contador Estadistiques