Dan de pasu la LSSI

El Gobiernu del Estáu aprobó ayeri l'enteproyectu de la Llei de Servicios de la Sociedá de la información, qu'agora tendrá de pasar pel parlamentu. El Gobiernu xustifica la LSSI en que vien a cubrir la falta d'un marcu llegal pal desenvolvimientu del comerciu electrónicu. La primer llei rellacionada cola rede del Estáu lleva más d'un añu dando que falar, y yá dende qu'entamaron con ella, bien de medios especializaos anduvieron al tantu de tolo que diba sabiéndose sobre'l testu llegal, que nun presta a toos. La crítica más dura a la llei nueva alcuéntresla en Kriptópolis, mediu independiente sobre seguridá n'Internet. Nesta web afirmen que la LSSI podría valé-y al gobiernu pa mandar trancar páxines que tengan puntos de vista que nun-y convengan.