Cymru lleva'l galés a la Eurocopa

|

Francia y Rumanía van abrir esti vienres la Eurocopa de fútbol, competición que se celebra nel estáu galu. Nella participa Cymru, seleición qu'emplegó per primer vegada'l galés nuna rueda de prensa del tornéu y qu'usa l'idioma na so cuenta de Twitter.

El segundu entrenador del combináu, Osian Roberts, foi entrugáu'l martes pola prensa en dos ocasiones en galés, idioma nel que'l téunicu tamién respondió. D'esta forma, la seleición del país baxo tutela británica reivindica'l so idioma, como demuestra tamién nes redes sociales, onde combinen mensaxes n'inglés y galés. Tamién en bretón como xestu, yá que Cymru escoyó la población bretona de Dinarzh como sede de concentración.

El galés ye la llingua celta con más vitalidá. Falada principalmente na zona norte del país, nos últimos años ta viviendo un procesu de recuperación, con un amuentu del númberu de falantes y una mayor penetración en toles estayes de la sociedá.

Ensin asturianos

A les 21 hores d'esta tarde, nel Stade de France, Francia y Rumanía van protagonizar el partíu inaugural de la Eurocopa 2016, primer gran competición de fútbol que nun va tener presencia asturiana dende l'añu 1992, cuando la seleición española quedó eliminada pol combináu galu nel camín pa la Eurocopa de Suecia. Vicente del Bosque nun convocó nesta ocasión a nengún xugador del país, anque'l sportinguista Jorge Meré participó na concentración xunto con otres promeses moces.

Alemaña, campeona del Mundu, ye la gran favorita pa esta cita, qu'amplía'l númberu d'equipos de 16 a 24. Esta circunstancia permite'l debú de combianos na fase final de la competición, casu de Cymru, Albania, Islandia, Irlanda del Norte y Eslovaquia. España y Francia son otres seleiciones con aspiraciones, un llistáu nel que tamién se pue añadir a Bélxica, la siempre competitiva Italia o la irregular Inglaterra.

Contador Estadistiques